Lukas Schneiderbauer ver doktorsritgerð sína Hálfskömmtuð heilmyndun fyrir svarthol (Semi-Classical Black Hole Holography), föstudaginn 25. september næstkomandi.
Vörnin hefst kl.14 í stofu 023, í Veröld - Húsi Vigdísar.
Andmælendur: Dr. Veronika Hubeny, prófessor við eðlisfræðideild UC Davis í Kaliforníu, Bandaríkjunum
Dr. Mukund Rangamany, prófessor við eðlisfræðideild UC Davis í Kaliforníu, Bandaríkjunum
Leiðbeinandi: Dr. Lárus Thorlacius, prófessor við Raunvísindadeild Háskóla Íslands
Einnig í doktorsnefnd: Dr. Bo Sundborg, prófessor við eðlisfræðideild Stokkhólmsháskóla
Dr. Valentina Giangreco M. Puletti, prófessor við Raunvísindadeild Háskóla Íslands
Dr. Þórður Jónsson, prófessor við Raunvísindadeild Háskóla Íslands
Doktorsvörn stýrir: Dr. Einar Örn Sveinbjörnsson, prófessor og deildarforseti Raunvísindadeildar Háskóla Íslands
Ágrip
Í ritgerðinni er fjallað um tvo eiginleika svarthola.
Fyrst er skoðuð ný aðferð við að reikna flækjuóreiðu á milli svarthols og Hawking geislunarinnar sem það sendir frá sér. Þessir útreikningar gefa til kynna hvort skammtaupplýsingar tapist við uppgufun svartholsins eður ei. Ef gert er ráð fyrir að upplýsingarnar varðveitist fylgir flækjuóreiðan svonefndum Page ferli. Reiknuð er flækjuóreiðan, annars vegar í þyngdarfræðilíkani sem kennt er við Callan, Giddings, Harvey og Strominger (CGHS) og hins vegar í líkani kennt við Russo, Susskind og Thorlacius (RST), og sýnt fram á að hún fylgir Page ferlinum í báðum þessum líkönum. Niðurstaðan er í samræmi við það að uppgufun svarthols sé ferli þar sem skammtaupplýsingar tapast ekki.
Einnig er skoðað hugtakið skammtafræðilegt flækjustig í tengslum við svarthol. Flækjustig skammtaástands segir til um hve margar einfaldar aðgerðir eða skref af ákveðinni gerð þarf til þess að mynda ástandið úr tilteknu viðmiðunarástandi. Susskind setti fram þá tilgátu að skammtafræðilegt flækjustig svarthols sé jafngilt tilteknu rúmmáli innan svartholsins. Önnur tilgáta tengir flækjustigið við þyngdarvirkni ákveðins hluta tímarúmsins sem skarast við svartholið. Prófaðar eru þessar tilgátur fyrir svarthol sem gufa upp með Hawking útgeislun í CGHS og RST líkönunum og sýnt að báðar tilgáturnar gefa flækjustig í samræmi við skammtafræði.
Um doktorsefnið
Lukas Schneiderbauer fæddist í bænum Ried im Innkreis í Austurríki árið 1989. Hann lauk framhaldsskólaprófi árið 2008 og hóf nám við háskólann í Vínarborg í Austurríki árið 2009. Þaðan útskrifaðist hann með BSc- og MSc-gráður í kennilegri eðlisfræði árið 2015. Eftir útskrift vann hann að rannsóknum tengdum MSc-verkefninu en flutti til Íslands til að stunda doktorsnám við Háskóla Íslands haustið 2016.